Aðalfundur Landssambands bakarameistara (LABAK) var haldinn í Húsi atvinnulífsins fimmtudaginn 18. apríl.
Á fundinum var kosin ný stjórn félagsins. Sigurður Már Guðjónsson hjá Bernhöftsbakaríi var endurkjörinn formaður og með honum í stjórn eru Sigurbjörg Sigþórsdóttir hjá Bakarameistaranum og Sigurður Örn Þorleifsson hjá Bæjarbakaríi.
Sæti varamanna í stjórn skipa Ingibergur Sigurðsson hjá Sveinsbakaríi og Vilhjálmur Þorláksson hjá Gæðabakstri/Ömmubakstri.
Á aðalfundinum var farið yfir starf félagsins fyrir komandi starfsár og eru stór verkefni fram undan, meðal annars heimsmeistaramót ungra bakara sem LABAK mun standa fyrir í sumar að ósk alþjóðasamtaka bakara og kökugerðarmanna (UIBC).
Einnig sköpuðust líflegar umræður á fundinum um starfsskilyrði bakaraiðnaðar og framtíðarhorfur hins gamalgróna félags.
